Атырау қаласында креативті индустрия мен өңірдегі инновациялық ортаны дамытуға арналған заманауи көпфункционалды Atyrau Creative Hub кеңістігінің ашылу салтанаты өтті.
Іс-шараға облыс басшылығы, ҚР Мәдениет және ақпарат министрлігінің және Креативті индустрияны дамыту қорының өкілдері қатысты.
Хабта коворкинг аймақтары, конференция залдары, кітапхана, медиа-студиялар, оқу сыныптары мен резиденттерге арналған кеңселер қарастырылған. Негізгі қызметі креативті индустрияларды дамытуға, жасанды интеллектіні қолдануға және әлеуметтік жобаларды қолдауға бағытталған.
Ашылу барысында жергілікті кәсіпкерлердің жәрмеңкесі, тақырыптық көрмелер, шеберлік сағаттары, дәрістер, 3D технологиялардың көрсетілімі және концерттік бағдарлама өтті. Сондай-ақ сала өкілдерімен кездесу ұйымдастырылып, онда мемлекеттік және жеке қолдау тетіктері талқыланды.
Хаб базасында алдағы уақытта IT, медиа, дизайн және кәсіпкерлік бағыттарында білім беру бағдарламаларын іске асыру жоспарланып отыр. Бұл кеңістік өңірде креативті экожүйені қалыптастыруға және жаңа бастамаларды қолдауға арналған негізгі алаңдардың біріне айналады.