Республикалық маңызы бар жол ауқымды жөндеу жұмыстарымен қамтылады

Қазіргі уақытта өңірде «Жезқазған – Петропавл» жолының 83 шақырымында жұмыстар  аяқталуда. Атап айтқанда, Николаевка және Покровка ауылдары арасындағы 40 шақырымдық учаскені қоса алғанда, Ломоносовка және Ставрополка, Тоқсан би және Новоишимка ауылдары арасындағы 43 шақырымда жаңа асфальт төселді.

 2025 жылы тағы 215 шақырым жөнделеді. Бескөл ауылы мен Покровка ауылы арасындағы 69 шақырым, Сергеевка қаласынан Ақмола облысының шекарасына дейінгі жалпы ұзындығы 146 шақырым жолда жөндеу жұмыстары өтеді. Сол аралықтарда қазір су өткізу құбырларын ауыстыру және құрылыс материалдарын дайындау жұмыстары жүріп жатыр.

2025 жылдың соңына дейін жолды орташа жөндеуден өткізіп қана қоймай су тасқынынан зақымдалған 24 су өткізу құбырын ауыстырып, тағы 72 су өткізу қыбыры жөнделеді.
СҚО-да «Жезқазған-Петропавл» жолының басым бөлігінде өткен ғасырдың 80-жылдарынан бастап ауқымды жұмыстар жүргізілген жоқ. Тек 2017-2018 жылдары Бескөл ауылы мен Петропавл қаласы арасындағы учаске қайта жаңартылды және 2023 жылы Сергеевка қаласы мен Николаевка ауылы арасындағы 51 шақырымдық жол учаскесіне орташа жөндеу жүргізілді. Тоқсан би ауылынан Ақмола облысы Есіл ауданына барар жол әбден ескірген.

«Жезқазған – Петропавл» автожолының қалған үш өңірден өтетін аралықтары да жөндеуден өтеді. Мәселен, 2025 жылдың соңына дейін Ақмола облысында 113 шақырым, Ұлытау облысында 109 шақырым, Қостанай облысында 71 шақырым жол жөнделеді. Демек, жолдың басым бөлігі жаңартылып, халық игілігіне берілмек.