ZHUBANOV UNIVERSITY ҒАЛЫМДАРЫ ҚЫТАЙЛЫҚ ҒАЛЫМДАРМЕН БІРГЕ ОТҚА ТӨЗІМДІ ПОЛИМЕРЛЕРДІ ӘЗІРЛЕУДЕ

ҚР Ғылым және жоғары білім министрлігінің шетелдің жетекші университеттерінен шетелдік сарапшыларды тарту саясатына сәйкес Қ.Жұбанов атындағы Ақтөбе өңірлік университетіне өртке төзімді полимерлерді әзірлеумен айналысатын ғылыми топ өкілдері келді, – деп хабарлайды zamandas.kz Ғылым және жоғары білім министрлігі баспасөз қызметіне сілтеме жасап.

Топ құрамында Қытай ғылым және технологиялар университетінің ғалымдары Юань Ху, Синь Ванг, Джисин Джу, Гонконг Политехникалық университетінің профессоры Бин Фей және Тунцзи университетінің профессоры Дженгжоу Ванг бар.

Профессор Юань Ху отқа төзімді материалдарды зерттеуде 30 жылдан астам тәжірибесі бар, 600-ден астам мақала жариялады және 70-тен астам патент алды. Профессор Синь Ванг 200-ден астам ғылыми мақалалардың авторы, хирш индексі – 70. Профессорлар Бен Фей мен Дженгжоу Ванг экологиялық таза отқа төзімді материалдарды зерттеу саласында 200-ге жуық мақала жариялады, ал Джисин Джу өртке қарсы қауіпсіздікті басқарудың интеллектуалды жүйелерін зерттейді.

Сарапшылар университет ғалымдарымен бірлесіп өртке төзімділігі жоғары материалдар жасау бағыты бойынша ғылыми зерттеу жұмыстарымен айналысып, тәжірибелерімен бөліседі. Бірлескен жоба полимерлер мен полимерлі композиттер негізінде көпфункционалды, отқа төзімді материалдарды жасау технологиясын дайындауға бағытталған. Жоба жетекшісі – Жұбанов университетінің ғалымы Әмірбек Бекешев. Шетелдік профессорлардың әрқайсысы осы бағыттағы міндеттерді кезең-кезеңімен жүзеге асыруға өз үлесін қосады деп күтілуде.

– Өрт қауіпсіздігі – әлемдік деңгейдегі өзекті мәселелердің бірі. Қытайда бір кездері тілсіз жауға қатысты қайғылы оқиға орын алғаннан кейін, өрт қауіпсіздігіне қатысты мәселемен айналысатын арнайы институт құрылды. Институт қазір тәжірибе тұрғысынан да, ғылыми тұрғыдан жетістікке ие. Бізге сол жоғары оқу орнында көп жылдардан бері отқа төзімді материалдарды зерттеумен айналысып жүрген сарапшы мамандардың алғашқы легі келді. Әріптестерімізбен бірге өрт қауіпсіздігін бағалау әдістері және полимерлі композиттер технологиясы бойынша эксперименттер жүргізуді талқыладық. Біздің қолданатын материалымыз бір болғанымен, әртүрлі әдіспен жұмыс жасаймыз, – дейді Әмірбек Бекешев.

Айта кетейік, осы бағдарлама аясында шетелдік ғалымдардың келесі тобы ағымдағы жылдың қыркүйек айында келеді деп жоспарланған.

https://www.facebook.com/watch/?v=518866017200215