Қарағандыда Қазақстандағы алғашқы ағылшын тіліндегі стендап-спешлдің түсірілімі өтті. Оның авторы әрі орындаушысы — комик және стендап-продюсер Шұғыла Сағынбекова.
Ұзақтығы 32 минуттан тұратын видео еліміздегі алғашқы ағылшын тілінде дайындалған стендап-концерт болып саналады. Бейнетүсірілім мен монтажды жергілікті продакшн-студия жасады.
Бұл жоба — Шұғыла 2023 жылдың соңында Қарағандыда бастамашы болған ағылшын тіліндегі ашық микрофон кештерінің жалғасы. Сол уақыттан бері ол Астана, Қарағанды және Алматы қалаларында 10-ға жуық іс-шара ұйымдастырған. 2024 жылдың қарашасында ол Астанада алғашқы жеке концертін берді, оған АҚШ-тың Қазақстандағы бұрынғы елшісі де қонақ болды.
Жобаның авторы ағылшын тіліндегі стендап Қазақстанның ағылшынтілді мәдени кеңістікте таныла түсуіне ықпал етеді деп есептейді.