Қазақстандық «Таргет» сериалы Amazon Prime Video платформасында қолжетімді болды. Көрермендерге жобаның сегіз бөлімнен тұратын толық бірінші маусымы ұсынылды. «Таргет» — Unico Play онлайн-кинотеатрының Originals жобаларының бірі.
Сериалдың оқиғасы әлеуметтік желі мен технология адам өміріне қаншалықты ықпал ете алады деген сұрақ төңірегінде өрбиді. Басты кейіпкер Марк — қарапайым мектеп оқушысы. Бір күні оның әлеуметтік желідегі парақшасында әлі болмаған оқиғаларды алдын ала көрсететін таргет жарнамалар пайда бола бастайды. Ал мектепте өрт болатыны туралы хабарлама келгенде, бұл жай ғана алгоритмнің кездейсоқтығы емес екені анық болады.
Марк достарымен бірге алда не болатынын түсінуге және қайғылы оқиғаның алдын алуға тырысады. Алайда «Таргет» тек жұмбақ таргет жарнамалар туралы хикая емес. Сериалдың өзегінде — өсею, достық, алғашқы махаббат, ата-анамен қарым-қатынас және адамның өз таңдауына өзі жауап беруі.
Жоба жасөспірімдер драмасын мистика және технологиялық триллер элементтерімен ұштастырады. Әлеуметтік желі мұнда жай ғана фон емес, оқиғаны алға жылжытатын негізгі құралдардың біріне айналған. Сериал көрерменге қарапайым, бірақ бүгінгі цифрлық дәуір үшін өзекті сұрақ қояды: біздің таңдауымызды кім жасайды — өзіміз бе, әлде бізді күн сайын зерттеп отырған алгоритмдер ме?
Басты рөлдерді Михаил Сотников, Аида Курмангалиева, Алина Ким, Радион Кан, Ансар Ильясов, Анастасия Дятлова, Асель Калиева, Максим Радугин, Рүстем Жаныаманов және Луна Гизатуллаева сомдады. Жоба кәсіби актерлермен қатар digital-ортада танылған жаңа буын өкілдерін де біріктірді.
«Таргеттің» Amazon Prime Video платформасына шығуы қазақстандық сериалдың жергілікті аудиториядан тыс көрерменге жол ашуына мүмкіндік береді. Бұл — отандық контенттің халықаралық стриминг платформаларындағы ауқымын кеңейтіп, Қазақстанда жасалған жобаларды жаңа аудиторияға таныстырудың тағы бір қадамы.
Сериалдың алғашқы маусымы Қазақстанда 2025 жылы жарық көрді. «Таргет» — Unico Play Originals жобасы.
Қазақстандық «Таргет» сериалы Amazon Prime Video платформасында жарық көрді
