Әлеуметтік желіде теңіз жағасында отырған әйел бейнеленген видео Каспийдегі қайғылы оқиғамен байланыстырылып тарады. Кейбір жазбаларда кадрдағы әйел қаза тапқан сарбаздардың бірінің анасы екені айтылған. Алайда видеоның Қазақстанға қатысы жоқ. Роликтің түпнұсқа авторы кадрлардың Марокконың Танжер қаласында түсірілгенін және видеодағы әйелдің Алжирден келгенін мәлімдеді.
«Видео Мароккода, Танжер қаласында түсірілді. Кадрдағы әйел — Алжирден келген қыз. Видеомның Қазақстан аудиториясына қалай тарап кеткенін өзім де білмеймін. Қазақстандағы жаңалықтардан хабарсыз едім, ол жақта ешқашан болған емеспін. Сарбаздарыңызға қатысты жағдайға қатты қайғырып отырмын. Көңіл айтамын», — деп жауап берді видео авторы.