Елордада 21 маусым күні кең ауқымды велошеру өтеді. Бұл ерекше шара «Таза Қазақстан» экологиялық акциясы аясында ұйымдастырылып, елорда тұрғындарын салауатты өмір салтын ұстануға және табиғатты қорғауға үндеуді көздейді, деп хабарлайды елорда әкімдігінің ресми сайты.
Велошерудің жалпы бағыты – 25 шақырым. Қатысушылар Қосшы бағыты бойындағы айналма веложолдан бастау алып, Үркер (Ильинка) тұрғын алабындағы «Жасыл белдеу» саябағында мәреге жетеді.
Тіркеу велошеру күні – 21 маусымда таңғы 07:30 бен 09:00 аралығында жүргізіледі. Шараның басталуы – сағат 09:00-де. Қатысу – тегін. Әрбір қатысушы өз велосипедімен келуі қажет.
Астана қаласының Дене шынықтыру және спорт басқармасының баспасөз хатшысы Мадина Айтқалиева бұл шараның жарыс емес екенін, бастысы – азаматтардың белсенділігі мен табиғатқа деген қамқорлығы екенін атап өтті.
Шара соңында ұйымдастырушылар тіркеуден өткен қатысушылар арасында лотерея өткізіп, бағалы сыйлықтар ойнататынын хабарлады.