Мемлекет басшысы Қасым-Жомарт Тоқаевтың тапсырмаларын орындау аясында еліміздің өңірлерінде өнеркәсіптік әлеуетті дамыту, көлік, инженерлік және әлеуметтік инфрақұрылымды жаңғырту жұмыстары жалғасуда. Жаңа өнеркәсіп өндірістері, денсаулық сақтау нысандары, жол желісі және әлеуметтік сала нысандары пайдалануға берілді.
Көлік инфрақұрылымы
Шығыс Қазақстан облысында Тереңсай асуын айналып өтетін автомобиль жолы және Пихтовка өзені арқылы өтетін Қазақстандағы ең биік таулы автомобиль көпірі ашылды. Жаңа нысандар жол қозғалысы қауіпсіздігін арттырып, өңірдегі елді мекендер арасындағы көлік қатынасын жақсартады.
Алматы облысында республикалық маңызы бар «Кеген – Нарынқол» автомобиль жолының 74 шақырымдық учаскесіне орташа жөндеу жұмыстары аяқталды. Жобаның құны – 8,1 млрд теңге. Күн сайын 1,2 мыңнан астам автокөлік қатынайтын жаңартылған жол учаскесінде 14 аялдама, 78 жол қиылысы мен кірме жол жөнделді.
Жетісу облысында Мұқыры асуындағы ұзындығы 21 шақырымдық төрт жолақты автожол ашылды. Жаңа жол қозғалыс қауіпсіздігін арттырып, жол жүру уақытын қысқартуға мүмкіндік береді.
Өнеркәсіп және өндіріс
Алматы облысында 2,5 млрд теңге инвестиция тартылған, тәулігіне 10 тонна ет өңдеуге қауқарлы ет өңдеу кәсіпорны іске қосылды. Жоба өңдеу өнеркәсібін дамытуға және ішкі нарықтағы отандық өнім көлемін арттыруға бағытталған.
Түркістан облысында құны 1,5 млрд теңгені құрайтын өнеркәсіптік металл конструкциялар мен металл бұйымдарын өндіретін зауыт іске қосылды. Кәсіпорын жылына 100 дана өнім шығаруға қауқарлы. Жаңа өндіріс орны өңірдегі өнеркәсіп өндірісінің ауқымын кеңейтуге мүмкіндік береді.
Абай облысында құны 8,4 млрд теңгені құрайтын өсімдік майын құю және қаптау цехы іске қосылды. Кәсіпорын тәулігіне 200 тонна май өндіруге қауқарлы. Жаңа цехтың іске қосылуы 100-ден астам жұмыс орнын ашуға және ішкі және сыртқы нарықтарда өнім жеткізу көлемін кеңейтуге мүмкіндік береді.
Қарағанды облысында 20,5 мың құсқа арналған, жасанды интеллект негізіндегі климатты бақылау жүйесімен жабдықталған құс шаруашылығы кешені іске қосылды. Кәсіпорын құс етінің өндірісін жылына 250–280 тоннаға арттыруға мүмкіндік береді.
Денсаулық сақтау және әлеуметтік нысандар
Алматы облысының Нарынқол ауылында ауысымына 250 адамға көмек көрсете алатын, күндізгі стационары және заманауи диагностикалық жабдықтары бар емхана ашылды.
Өскемен қаласында Шығыс Қазақстан, Абай және Павлодар облыстарының тұрғындарына арналған 148 орындық Гематология орталығы салынды. Нысан құрылысына, оның ішінде мемлекетке қайтарылған активтер қаражаты есебінен 33,6 млрд теңге бағытталды.
Түркістан облысының Сарыағаш ауданында шағын футбол, волейбол және баскетбол алаңдары, сондай-ақ воркаут-аймақтары бар жаңа спорт және балалар ойын алаңдары ашылды. Жаңа нысандар ауыл тұрғындарының спортпен шұғылдануына және белсенді демалуына қолайлы жағдай жасайды.
Қостанайда 1000 орындық трибуналары, жүгіру жолдары мен футбол, баскетбол және волейбол алаңдары бар көпфункционалды стадион (2,9 га) ашылды.