Түркістан облысында «Ұлы Жібек жолы бойындағы керамика өндірісі: дәстүр, технология және жаңғыру» тақырыбында қыш шеберлерінің халықаралық жәрмеңкесі өтті.
Іс-шараға жергілікті атқарушы органдардың өкілдері, мәдениет мекемелерінің басшылары, өңірлерден және шет мемлекеттерден келген қыш шеберлері қатысты.
Бағдарлама аясында қыш бұйымдарын дайындаудың дәстүрлі технологиялары бойынша шеберлік сабақтары өтті. Қатысушылар кәсіби тәжірибе алмасып, өз жұмыстарында қолданатын әдіс-тәсілдерді көрсетті. Бұдан бөлек, олар өз қолдарынан шыққан бұйымдарды «Отырар» мемлекеттік археологиялық музей-қорығының қорына табыстады.
Жәрмеңке қыш өнерінің дәстүрін сақтауға, шеберлердің кәсіби білігін жетілдіруге және халықаралық мәдени байланысты нығайтуға бағытталды.