«Jastar Jalyny-2024»: Астанада студенттік фестиваль өтіп жатыр

Халықаралық студенттер күніне орай Астанада Жастар саясаты мәселелері басқармасы жыл сайынғы «Jastar Jalyny-2024» студенттік фестивалін ұйымдастырды, деп хабарлайды елорда әкімдігінің ресми сайты.

Бүгінгі іс-шараның ашылу салтанатында студенттер өз оқу орынын таныстырды.

Ұйымдастырушылардың айтуынша, осы жылғы фестивальдің ерекшелігі – спорттық номинациялардың қосылуы.

Аталған фестиваль елордада 5-14 қараша аралығында өтеді. Әр күн белгілі бір номинацияға арналған: футбол, волейбол, үстел теннисі, шахмат, эстрада, ұлттық би, заманауи би, ұлттық аспаптар (домбыра), театр, мобилография. Ал 14 қарашада гала-концерт өтеді деп жоспарланған.

Әр номинация бойынша жүлделі орынға ие болған қатысушыларға қаржылай сыйлықтар қарастырылған: 1-орынға 100 мың теңге; 2-орынға 70 мың теңге; 3-орынға 50 мың теңге. Ал жоғарыда аталған 10 номинация бойынша ең үздік атанған жоғары оқу орнына бас жүлде – 500 000 теңге беріледі.

«JASTAR JALYNY» фестивалі жастардың шығармашылық әлеуетін ашу, дарынды жастарды анықтау, дарынды балалар мен ұжымдардың шығармашылық дамуына қолдау көрсету және жағдай жасау, рухани әрі мәдени әлеуетін дамыту, студенттерге эстетикалық және этикалық тәрбие беру жүйесін жетілдіру, азаматтық, әлеуметтік жауапкершілік, патриоттық сезім, адамгершілік құндылықтар мен көшбасшылық қасиеттерді арттыру мақсатында өткізіліп келеді», – деді Жастар саясаты мәселелері басқармасының баспасөз хатшысы Әнел Мансұрова.