Сандықтау ауданында орналасқан «Агро LAKE» жауапкершілігі шектеулі серіктестігі мал шаруашылығын дамытуда, негізгі басымдықты жылқы мен ірі қара мал өсіруге бағыттауда. Шаруашылықта малды ұстауға қолайлы жағдайлар жасалған, толыққанды азықтандыру, ветеринарлық қызмет көрсету және селекциялық жұмыстар жүйелі түрде ұйымдастырылған. Кешенді тәсіл мал басының денсаулығын нығайтып, төзімділігі мен өнімділік көрсеткіштерін арттыруға мүмкіндік береді.
Қазіргі таңда ірі қара мал саны 450 басты құрайды. Даму жоспарларына сәйкес, 2026 жылы бұл көрсеткіш 550 басқа, ал 2028 жылға қарай 650 басқа дейін жеткізіледі.
«Біз мал шаруашылығын кәсіпорын дамуының стратегиялық бағыты ретінде қарастырамыз. Басты мақсатымыз – мал басын көбейтіп қана қоймай, заманауи технологиялар мен саланың озық тәжірибелерін қолдана отырып, жануарларды жоғары деңгейде ұстау сапасын қамтамасыз ету», – деп атап өтті «Агро LAKE» ЖШС басшысы Андрей Галюк.