Депутат: Судьялар сайланатын болса, Сарыағаштағы қыз педофилдің қолынан өлмес еді

«Сарыағаштағы резонансты оқиға есіңізде шығар, ол жерде сот бұрын ауыр қылмыс жасаған адамға өте жеңіл жаза тағайындағанның кесірінен жан түршіктіретін қылмыс тіркелді ғой. Мұндай жайттар қайталанбау үшін не істеу керек?» деп сұрады БАҚ өкілі.

Депутат бұл елімізде «сот тәуелсіздігі» деген ұғымның теріс бұрмаланып кетуіне байланысты екенін айтты.

«Ол енді заңның жергілікті орында теріс орындалуының салдары. Бұл жерде тағы бір мәселе бар. Судьялардың тәуелсіздігін қамтамасыз етеміз дедік те, халықтың алдындағы жауапкершілігін жойып тастадық. Түсінікті болу үшін айтайын. Мысалы, Американың көптеген штатында судьялар қызметке сайлау арқылы келеді. Сондықтан халықтың алдында белгілі бір деңгейде жауапты болады. Қазір біздегі судьялар абсолютті түрде ешкімнің алдында жауап бермейді. Олар адамдарды қабылдамайды да. Мысалы, атқарушы билік өкілдері жыл сайын халық алдында есеп беріп, азаматтарды жеке мәселесі бойынша қабылдауға міндеттелген. Заң шығарушы билік сайлау арқылы жасақталады. Ал сот билігі абсолютті тәуелсіз болып кетті. Бұл да белгілі бір дәрежеде дұрыс емес деп ойлаймын. Халықтың осындай бір ерекше наразылығы туындаған кезде ғана, қоғамның ашу-ызасы кемеріне жеткенде ғана әрекеттер жасалады. Негізі бұл дұрыс емес», – дейді заңгер.

Мәжіліс депутаты сот билігін халық алдында жауапты ету мәселесін сала өкілдері қабылдағысы келмейтінін де айтып қалды.

«Әзірге бұл туралы әңгіме қозғау ертерек шығар. Бірақ өз басым Мәжілістегі заңнама және сот-құқықтық реформа комитетінің мүшесі ретінде осы мәселені көтеріп жүрмін. Судьялардың халық алдында белгілі бір дәрежеде жауапкершілігі болуы керек деп есептеймін. Бара-бара судьяларды сайлайтын күнге де жетерміз. Дәл қазір оны талқыламақ түгіл естігісі келмейді де. Шындық сондай», – деді Абзал Құспан.