Т.СҰЛТАНҒАЗИЕВ ШЫМКЕНТ ЖҰРТШЫЛЫҒЫМЕН КЕЗДЕСУ ӨТКІЗДІ

Шымкентке жұмыс сапары барысында денсаулық сақтау бірінші вице-министрі Тимур Сұлтанғазиев оңтүстік мегаполистің медициналық ұйымдарының жұмысымен танысты. Ол 23 учаскеге тіркелген 40 мыңға жуық халықты бастапқы медициналық көмекпен қамтамасыз ететін №1 қалалық емханаға барды.

Т.Сұлтанғазиев әсіресе диспансерде есепте тұрған науқастарға консультативтік-диагностикалық көмектің қолжетімділігі бойынша жағдаймен, мамандарға кезектілік жайымен, азаматтардың өтінімдері бойынша және колл-орталық жұмысымен де танысты.

Соған қоса вице-министр вакцинация жүргізуге дайындық, медперсоналдың сол туралы білімі мен машықтары, иммундауға арналған дәрілердің сақталу шарты, «салқындату желісіндегі» температуралық режимнің сақталуына назар аударып, ақпараттық жүйелер жұмысын қарады.

Сондай-ақ сапар аясында бірінші вице-министрдің блогерлермен, ҮЕҰ белсенділерімен, өңір дәрігерлерімен кездесуі өтіп, соның барысында таяуда АПВ, яғни адам папилломы вирусына қарсы вакцинация жүргізу мәселесі туралы толығырақ түсіндірілді.

Одан әрі Шымкент қаласының қоғам өкілдерімен есепті кездесуде Тимур Сұлтанғазиев ведомство тарапынан халық үшін медициналық көмекті жақсарту бойынша жүзеге асырылып жатқан шаралар туралы баяндады.

«Ашылған «Бір күндік клиника» базасында бірінші рет ұрықтың туа бітті патологиясы қаупін дер кезінде анықтау және босану алдындағы диагностиканы жүргізу мүмкіндігі пайда болды. Сонымен қатар респираторлық аурулар, гемодиализ, нефрология, ревматология, орфандық аурулар бойынша құзырет орталықтарын ашу жөніндегі жұмыстар белсенді түрде жүргізілуде», – деп атап өтті өз сөзінде бірінші вице-министр.

Дәрі-дәрмекпен қамтамасыз ету мәселесінде ол аурулар мен дәрілік заттар тізімі клиникалық хаттамалар базасында сәйкестендіріліп, оңтайландырылғанын, ал 2025 жылдан бастап амбулаторлық дәрілік қамтамасыз етуді жоспарлауды толықтай автоматтандыру үшін оны енгізу жоспарланып отырғанын жеткізді.

Қала тұрғындарын жеке қабылдау кезінде азаматтар емханалардағы дәрілік қамтамасыз ету, салалық тар бейінді мамандарға қабылдауға жазылу, ерекше қажеттіліктері бар адамдарға медициналық қызмет көрсету мәселесін көтерді.

Сапар қорытындысында Т.Сұлтанғазиев ағымдағы эпидемиологиялық жағдай туралы БАҚ өкілдерінің сұрақтарына жауап берді.