Елордадағы «JOLTAP» жобасы: тегін оқыту, кәсіп ашу және жұмысқа орналасу

Астанада «JOLTAP» әлеуметтік жобасы қала тұрғындарына жаңа мамандықтарды тегін үйренуге, өз ісін ашуға, жұмыс табуға және 52 мемлекеттік қолдау шарасы бойынша кеңес алуға мүмкіндік береді. Бүгін, 29 тамыз күні Астана қаласында «JOLTAP» жобасының бастау алғанына бір жыл толды.

Осы қысқа мерзім ішінде 5,6 мыңнан астам қала тұрғыны оқытылды. 3,2 мыңнан астам адам жұмысқа орналасты, сол сияқты тапсырыстарды қашықтан қабылдай бастады немесе өз ісін ашты.

«JOLTAP» жобасы Мемлекет басшысының тапсырмаларын орындау мақсатында іске асырылуда және жұмыспен қамту саласында қолданыстағы шараларға қосымша болып саналады. Жобаның бастамашылары – Астана қаласының әкімдігі, бірлескен оператор – «Жаңа мүмкіндік» қоғамдық қоры.
Жобаның негізгі мақсаты – азаматтарға табысын арттыруға көмектесу және кешенді көмек көрсету. Көші-қон көрсеткіші ескеріле отырып, жастарға ерекше көңіл бөлінеді.
Жоба осыдан тура бір жыл бұрын басталған болатын. Онда елорда тұрғындары көп жиналатын орындарда «Баршаға мүмкіндік» модульдік пунктері алғаш рет есігін айқара ашты.

Осы модульдік пунктердің мақсаты есепке алынбаған жұмыссыздықты анықтау және 52 мемлекеттік қолдау шарасы, жұмысқа орналасу мүмкіндіктері және қысқа мерзімді оқытуға жазылу бойынша тиімді консультациялар беру үшін жобаның мақсатты аудиториясының өмірлік жағдайларын анықтау болып саналады. Қажет болған жағдайда қала тұрғындарына қосымша цифрлық сүйемелдеу, атап айтқанда ЭЦҚ қайта шығару, kezekte.kz, enbek.kz, indigo.kz, тұрғын үйге кезекке тұру, АӘК алу және т.б. ресурстарға тіркеу ұсынылады. Осындай бастаманың арқасында бір жыл ішінде елорданың 20 мыңнан астам тұрғыны сенім артып, жобаға қатысты. 4,5 мыңнан астам қала тұрғыны модульдік пунктер арқылы мемлекеттік қолдау шаралары бойынша әкімдік басқармаларына бизнес ашу, тұрғын үй, жұмысқа орналасу, балаларға білім беру және бос уақытты тиімді пайдалану мәселелері бойынша өтінімдер жолдады.

«JOLTAP» жобасын іске асырудың екінші кезеңі 15 жұмысшы (бариста, сатушы-кассир, тігінші, модельер-конструктор, бухгалтерлік есеп негіздері, аяқ киім жөндеу, электр газ маманы, корпустық жиһаз жасау негіздері) және цифрлық дағдылар (сайт әзірлеушісі, мобилограф, таргетолог, видеомонтаж, графикалық дизайнер, SMM, негізгі цифрлық дағдылар т.б.) бойынша практикаға арналған оқу сыныптары мен цехтарды іске қосу болып саналады.

Мамандықтар тізімі қаланың экономикалық ерекшелігін ескере отырып, сауда, сервис, фриланс және өндіріс салалары бойынша қалыптастырылды.

Жобаның аралық қорытындысын шығару жөніндегі кездесуде Астана әкімі Жеңіс Қасымбек былай деп атап өтті: «Өмір сапасы көп жағдайда алған кәсібі мен жұмысына байланысты. Бірақ өкінішке қарай, қала тұрғындарының бәрі бірдей мамандық иесі атана алған жоқ. Біздің міндетіміз – қазіргі нарықта қажетті дағдыларды меңгеруге және жұмысқа орналасуға көмектесу. Мемлекет адамдарды қолдау және жұмысқа орналастыру бойынша түрлі әлеуметтік бағдарламаларды іске асыруда. Өткен жылы қалада «JOLTAP» әлеуметтік жобасын іске қостық. Бұл бағдарламаның айырмашылығы – адамдарға жаңа мамандық бойынша білім алуға мүмкіндік беріледі. Көрсеткішке сүйенсек, бұл жобаның жүзеге асқанын және артықшылығын көрсетеді».

Жалпы, жобаның экожүйесі қала тұрғындарына табысын арттыру бойынша кешенді жолдарды ұсынады. Қала тұрғындары практикалық салалық құзыреттерді ғана емес, сонымен қатар өз ісін (SMM, мобилография, бухгалтерлік есеп) жүргізу үшін негізгі дағдыларды игере алады және кәсіби қоғамдастықтың бір бөлігіне айналады.

Жобаны іске асырудың келесі кезеңі қаланың жұмыс берушілерімен тікелей жұмыс істеу және «JUMYSTAP.kz» сервистік платформасын іске қосу болып саналады. Бұл жобамен «Magnum», «Спортмастер», «GLB», «Danmard» тігін фабрикасы, «Ютария», «YDA» зауыты және т.б. сияқты қаланың барлық желілік және ірі жұмыс берушілері қамтылды. Жалпы,«JOLTAP» жобасы жұмыс берушілер тарапынан қолдау тапты, өйткені кадр тапшылығы мәселесі бизнес өкілдері үшін маңызды болып саналады.

Кадр проблемасын шешу үшін жоба аясында жұмыс іздеушілерді жұмыс берушілермен және тапсырыс берушілермен байланыстыратын «JUMYSTAP» сервистік платформасы іске қосылды. Жұмыс берушілер өздерінің жарнамаларын еш қиындықсыз жариялау үшін платформаны пайдалана алады. Мұнда қарапайым интерфейстің көмегімен үміткерлерге қойылатын талаптарды егжей-тегжейлі сипаттауға болады және осы жұмыс орындарын жұмыс іздеушілердің кең пулымен бірден бөлісуге болады. Бизнес өкілдері мен жеке тұлғалар тұрақты жұмыс орнына қызметкерді ғана емес, сонымен қатар көлемді тапсырыстарды орындау үшін орындаушыларды да таба алады.

Айта кету керек, елдің басқа аймақтарының тұрғындары жобаны кеңейту туралы жиі өтініш жасайды. Бұл Үкімет тарапынан да атап өтілді және жобаның ауқымын 4 аймаққа – Алматы, Шымкент, Ақтөбе және Қарағанды қалаларына кеңейту туралы шешім қабылданды. «JOLTAP» жобасының тиімді іске асырылуы да Қазақстанның 2023 жылғы әлеуметтік саладағы дамуының қорытынды шолуына енді. Тұтастай алғанда, іске асырылған жылы жоба халық, бизнес және мемлекет тарапынан жоғары бағаға ие болды.