Біз медициналық ынтымақтастық,білім және технологиялар алмасу тұрғысынан бір-біріміз үшін бұрынғыдан да ашық болуымыз керек

Астанада Түркі мемлекеттері ұйымына қатысушы елдердің денсаулық сақтау министрлерінің V кездесуі шеңберінде шетелдік делегациялар Ұлттық ғылыми онкология орталығына (ҰҒОО) барды.
Қонақтардың арасында ұйымның Бас хатшысы Кубанычбек Өміралиев, ДДҰ Еуропалық өңірлік бюросының директоры Ханс Клюге, сондай-ақ Түркітілдес елдердің денсаулық сақтау министрлері бар.

Делегацияларға радиоизотоптық диагностика мен жоғары технологиялық емдеудің заманауи әдістері қолданылатын тераностика, сәулелік және протондық терапия бөлімшелерін қоса алғанда, радиациялық технологиялар орталығы жұмысының негізгі бағыттары ұсынылды.

«Ұлттық ғылыми онкология орталығын біз тек көрсетіп қана қоймай, онкологиялық аурумен ауыратын пациенттерге медициналық көмек көрсету саласындағы бар мүмкіндіктер мен әлеуетті белгілегіміз келеді. Мұнда ұсынылған жабдықтардың көптеген түрлері Орталық Азияның бүкіл өңіріне ғана тән, сондықтан біз халқымыз үшін бірлескен жұмыс құруға міндеттіміз. Біз медициналық ынтымақтастық,білім және технологиялар алмасу тұрғысынан бір-біріміз үшін бұрынғыдан да ашық болуымыз керек», – деп атап өтті Қазақстанның денсаулық сақтау министрі Ақмарал Әлназарова.

Делегация радиоизотоптық диагностика секторына ерекше назар аударды. Негізгі технологиялардың арасында:
* Фотондарды цифрлық санаумен ПЭТ/КТ — сәулеленудің ең төменгі дозасында жылдам және дәл диагностиканы қамтамасыз етеді;
* ПЭТ/МРТ — бір зерттеуде екі әдісті біріктіретін Орталық Азияға ғана тән аппарат, бұл әсіресе күрделі онкопатологияда тиімді;
* ОФЭКТ/КT — көптеген ауруларды диагностикалау үшін функционалды және анатомиялық бейнелеуді біріктіреді.

Радионуклидтік терапия секторына сұйық радиоактивті қалдықтарды желдетудің және сақтаудың арнайы жүйелерімен жабдықталған 8 «белсенді палата» кіреді. Бұл қондырғылар радиоактивті препараттарды қолданатын пациенттерді емдеуге арналған.
Сәулелік терапия бөлімшесінде мультидисциплиналық топтың (МДТ) көрсетілімдері мен қорытындысы бойынша әдістердің кең спектрі жүргізіледі: операция алдындағы және операциядан кейінгі терапия, химиотерапиялық, сабақтас және аралас емдеу, дербес (радикалдық) сәулелік терапия, сондай-ақ паллиативтік сәулелену. Емшаралардың тиімділігі мен қауіпсіздігін қамтамасыз ету үшін Varian Medical Systems Inc (АҚШ) компаниясының заманауи қондырғылары қолданылады: BRAVOS байланыс терапиясы жүйесі, EDGE қондырғылары, TrueBeam STx және Ethos адаптивті сәулелік терапия жүйесі.

Орталық Азияда тұңғыш рет Қазақстанда онкологиялық көмектің жаңа дәуірін ашатын бірегей жоба — ҰҒОО базасында Протондық терапия орталығы құрылуда. Протондық терапия – қатерлі ісіктерді емдеудің ең дәл және қауіпсіз әдістерінің бірі. Жоба әлемдегі ең озық жобалардың бірі – Varian ProBeam жүйесін қолдану арқылы жүзеге асырылады. Орталықтың ашылуы 2025 жылдың жазына жоспарланған: құрылыс және монтаж жұмыстары аяқталды, жабдық орнатылды, мамандар жетекші халықаралық клиникаларда оқытылуда.

«Орталықтың жалпы ауданы 60 мың шаршы метрді құрайды. Жоспарлы қуаты – 210 төсек, алайда қазір біз бұл көрсеткіштен асып отырмыз. Емхана күніне 500 адамды қабылдауға есептелген. Жоба 6 жыл бойы дамып, озық онкологиялық технологиялардың хабына айналды. Желтоқсан айында біз көшуді аяқтадық, енді жыл сайын шамамен 15 мың пациент көмек алады деп күтеміз. Біздің стратегиялық әріптесіміз Deloitte компаниясы болды – жоба өте күрделі болғандықтан, бізге халықаралық стандарттарға сәйкес сараптамалық сүйемелдеу қажет болды» – деп атап өтті ҰҒОО басқарма төрағасы Жандос Бүркітбаев.

Диагностикалық рәсімдер алдын ала жазылу бойынша жүргізіледі және ТМККК және МӘМС тізбесіне кіреді. Орталықтың жұмысында пациенттерді зерттеуге дайындау стандарттарын қатаң сақтауға және жеке көзқарасқа баса назар аударылады.

Мұндай сапарлар тәжірибе алмасуға ықпал етеді және қазақстандық медицинаның онкологиялық ауруларды жоғары технологиялық диагностикалау және емдеу саласындағы нақты мүмкіндіктерін көрсетеді. Кездесу барысында одан әрі ынтымақтастық, тәжірибе алмасу, бірлескен білім беру және клиникалық жобаларды іске асыру туралы ұсыныстар айтылды. Халықаралық әріптестердің тарапынан қызығушылық Ұлттық ғылыми онкология орталығының қазіргі және болашақтағы жоғары әлеуетін растайды.