Елордалық волонтерлер коммуналдық қызметкерлерге шай мен бауырсақ таратты

Соңғы күндері қардың толассыз жаууына байланысты қаладағы барлық ауданда коммуналдық қызмет күшейтілген режимде тәулік бойы жұмыс істеп жатыр, деп хабарлайды елорда әкімдігінің ресми сайты.

Соған байланысты елордалық волонтерлер қар күреу жұмысына жұмылдырылған мамандарға ыстық шай мен бауырсақ таратты. Волонтерлер қаланың барлық аудандарында осындай іс-шара өткізіп жатыр.

«Бізге үнемі қолдау көрсететін волонтерлерге алғыс айтамын. Бүгін міне бәріміз қар күреп жатырмыз, жұмыс өте көп. Осындай жылу сыйлап жатқандарыңыз үшін көп рахмет», – деп жұмысшылардың бірі жастарға алғысын айтты.

Сонымен қатар Астана волонтерлері зейнеткерлер мен ерекше қажеттілігі бар азаматтардың үйінің маңын қардан тазартуға көмектесті. Мұндай акция қаладағы барлық 5 ауданда басталды. Қысқы маусым басталғанға дейін орталық мамандары аудандық әкімдіктерден көмек қажет азаматтардың тізімін алып, сол бойынша жұмыс істейді. Кейбір тұрғындар әлеуметтік желі арқылы волонтерлерден көмек сұрайды. Бүгін волонтерлер жеке тұрғын үй секторындағы бірқатар үйлердің ауласын қардан тазарты.

Волонтерлер қыс уақытында қар күреумен қатар, тұрақты түрде азық-түлік себеттерін тарату, отын жару және ауа райы қолайсыз кезде шай ұсыну сияқты көмек көрсетіп тұрады.

Волонтерлердің атуынша қайырымдылық акциясы қыстың соңына дейін жалғасады.