Финляндияны жеңе аламыз – Магомед Адиев

Бүгін футболдан 2024 жылы Еуропа чемпионатының іріктеу турнирі аясында өтетін Қазақстан мен Финляндия командалары матчының қарсаңында ұлттық құраманың бас жаттықтырушысы Магомед Адиев ойын туралы өз ойын айтты.

Ол БАҚ өкілдеріне берген шағын сұхбатында Финляндия құрамасы бас жаттықтырушысының жақсы команда жасақтап алғанын, ойыншыларының бәрі сыннан сүрінбей өткен тәжірибелі футболшылар екенін атап өтті.

Финляндия оңай қарсылас емес. Оларда шабуылда жақсы ойнайтын үш ойыншы бар. Финдердің көбісі Пукки арқылы ойнайды. Оң қапталдан ойынға белсенді кіріседі.

Финляндия – қорғаныстан шыға алатын, шабуылда жылдам ойнағанды ұнататын команда. Бірақ олар позициялық шабуылдарға немқұрайлы қарайды деп айта алмаймын. Қарсыластан көп тактикалық ойын күтемін. Менің фин әріптесім жақсы команда жасақтап алған екен.

Қарсыласты ұтуға болады. Біздің жігіттердің қолынан бәрі келеді, – деді ол.

Кездесуде бас жаттықтырушы Михаил Габышев пен Бауыржан Исламханның жарақат алғанын, олар Финляндиямен матчқа шыға алмайтынын ескертті.

Екеуінің жарақат алғаны, әрине, қиын. Оларға ота жасалды. Жігіттермен сөйлестік, қолдау көрсеттік. Оларды алаңда да, ұлттық құрамада да күтеміз. Оң қаптал жайлы айтатын болсақ, Габышев жарақат алғанға дейін де мен бұл позицияға басқа ойыншыны қоюды жоспарлағанмын. Габышев жарақат алмаса да алаңға алғашқы минуттардан шықпайтын еді. Бізге бұл орынға басқа ойыншы керек. Оның кім екенін ойында көресіздер. Тапаловқа келсек, ол Солтүстік Ирландияға қарсы алаңға шығады, – деді Магомед Адиев.

Сонымен бірге ұлттық құраманың бас жаттықтырушысы жаңа футболшылардың шақырылғанын айтып, осы жігіттер ұжымға тез сіңісіп, командаластарына үлкен қолдау болатынына сенім білдірді.

Еске сала кетсек, бүгін – 7 қыркүйекте Астанада кешкі сағат 20:00-де 2024 жылғы Еуропа чемпионатының іріктеу турнирі аясында Қазақстан мен Финляндия ұлттық құрамаларының матчы басталады.

Қазір турнир кестесінде Қазақстан құрамасы төрт ойыннан кейін 9 ұпаймен Финляндия командасынан кейін екінші орында тұр. Скандинавия түбегінің құрамасында да 9 ұпай бар. Бірақ доп айырмашылығы бойынша Суоми елінің көрсеткіші жақсы. Олар қарсыластар қақпасына 10 доп салып, 3 гол жіберіп алған. Ал біздің ұлттық құрама 8 гол салып, 4 допты өз қақпасына кіргізген.

Турнир кестесінде үшінші және төртінші орындарды Дания мен Словения құрамалары бөлісіп отыр. Оларда да ұпай саны бірдей. Екеуінде төрт матчтан кейін 7 ұпайдан бар. Ал бесінші және соңғы орында Солтүстік Ирландия мен Сан-Марино командалары келеді. Британия елінің құрамасында 3 ұпай болса, Сан-Марино әлі бірде-бір ұпай алған жоқ.

10 қыркүйекте еліміздің бас командасы өз алаңында осы Солтүстік Ирландия жасағымен ойнайды.

Дастан Жұмабекұлы