Әлеуметтің әлеуеті арта түспек

Кіндігі ауылда байланған елдің ұрпағымыз ғой. Президенттің ауылды көркейту, ондағы елдің тұрмысын оңалту турасындағы тұщымды тапсырмалары көңілімді көншітті.

Шағын және орта бизнесті дамыту, кәсіп­керлерге қолдау білдіру, әсіресе несие­лендіру жағдайын оңтайландыру мәсе­лелеріне айрықша назар аударылды. Шал­ғайдағы ауыл тұрғындарына тиісті игі­ліктің бәрі қолжетімді болатыны, ол үшін мемлекет көрсететін қызметтер тура­лы заңдарға өзгертулер енгізілетінін атап айтты.

Расында, елдің күнкөріс көзіне айнал­ған шағын және орта бизнесті дамыту күн тәртібінде тұрған мәселе. Осы саланы кеңей­ту арқылы әлеуметтік осал топтағы азаматтарды қолдап, олардың өз нәсібін кәсібінен табудың мүмкіндігі молая түсері сөзсіз. Жасы­ра­тыны жоқ, елімізде мүмкіндігі шек­теулі жандардың қатары өспесе, кеміп отырған жоқ. Олардың арасында мемлекеттік қолдауға мұқтаждары да жоқ емес. Сондай-ақ спорттық нысан­дарды жаң­ғыр­ту жайы назардан тыс қал­мады. Қарап отырсаңыз, барлығы да адам­ның жайлы ортада қалыпты өмір сүр­уіне жасалған нық қадамдар деуге болады.

Президенттің «Ауыл – алтын бе­сігім», «Ауыл аманаты» атты бағ­дар­­ламаларды іске асыруда мемле­кет тарапынан қар­жы­лай қолдау көр­се­ті­летіндігі, жер, су мәселесінде де өте маңызды жайт­тардың көтерілуі шын мәнінде әлеу­меттің әлеуетін күйттеген қадамдар деп қа­был­дадым. Адами капиталды дамыту, кадр­лар­ды даярлау, білім сапасын арттыру, мектептердің техникалық базасын нығайту мен шекаралы аймақтардағы 65 ауылдың тұр­мыстық жағдайын жақ­сарту жайы бүгінгі күннің ең өзекті мәселелері екендігін аңғартады. Соны­мен қатар «Қазақстан – 2050» стратегиялық бағ­дар­ла­масын түбегейлі қайта қарау қа­жеттігі де елең еткізді.

Ел аманатын арқалаған мәжілісмендер мен әр деңгейлі мәслихат депутаттары бірлесе жұмыс істегенде ғана «Күшті Президент – ықпалды Парламент – есеп беретін Үкімет қалыптасады» деген сеніммен сөзін аяқтады. Бүгінгі сессия жұмысы қоғам алдында зор міндеттер тұрғанын, оны жүзеге асыру арқылы халықтың әлеуметтік-экономикалық ахуалы әлдеқайда жақсара түседі деген үміттемін.

Нәйлә ҮМБЕТОВА,

Құрмет орденінің иегері