«Әлия» фильмі біз үшін маңызды болып қала береді

Мәдениет және ақпарат министрі Аида Балаева аты аңызға айналған мерген Әлия Молдағұловаға арналған «Әлия» көркем фильмі түсірілімінің неліктен тоқтатылғаны жөнінде  Facebook парақшасына жазды. Онда министр  ең алдымен фильмнің маңызына тоқталады.

– Ең алдымен, Әлия Молдағұлованың ерлігін бәріміз қашан да есте сақтап, құрметтейтінімізді атап өткім келеді. Оның тарихы біздің ұлттық жадымыздың ажырамас бөлігі саналады және министрлік Әлия Молдағұлованың батырлығы жайлы фильмнің үлкен экрандарға шығуына мүдделі, – деп жазды министр.

Сондай-ақ Балаеваның айтуынша, бұл фильмнің бюджеті өте ауқымды.

«Әлия» фильмі біз үшін маңызды болып қала береді. Бұл жалпы бюджеті 900 млн теңгеден асатын ауқымды жоба. Оның 450 млн теңгесі жеке инвестициялар, ал қалған қаражатты кинокомпания мемлекеттік бюджеттен алуды жоспарлаған. Биыл маусым айында фильм түсіруді жоспарлап отырған топ ұлттық киноны қолдау жөніндегі мемлекеттік орталық ұйымдастырған питчингке қатысып, мемлекеттік қолдауға үміткер картинаның сценарийін ұсынды. Ведомствоаралық комиссия отырысының нәтижесінде қаржыландыруға 18 жоба ұсынылды, оның ішінде «Әлия» фильмі де бар», – деді Аида Балаева.

Алайда фильмді ұсынған кинокомпания Әлия Молдағұлова туралы фильм түсіру жауапты іс екенін және оның қазақстандық көрермен үшін маңызы зор екенін ескере отырып, мемлекеттік қаражатты ұтымсыз пайдаланудың алдын алу мақсатында конкурсқа қатысуды уақытша тоқтата тұруға шешім қабылдаған.

«Бұл шешім жоба айтылған уақыттан біршама кешігіп шығуы мүмкін болған соң қабылданды. Себебі, түсірілімнің негізгі бөлігі Беларусь Республикасының аумағында өтуі тиіс еді, онда соғыс қимылдарының көріністерін түсіру жоспарланған болатын. Алайда қазір Белоруссия басқа жобалардың, негізінен ресейлік жобалардың жоғары жүктемесіне байланысты қажетті табиғи алаңдарды ұсына алмайды. Яғни, табиғи декорацияларды қолдану кестесін келісу мүмкін болмады, содан кейін мерзімдерді бұзу және жобаны уақытылы аяқтамау қаупі туындады. Осыған байланысты Шығыс Қазақстан облысында өзінің табиғи алаңдарды қалпына келтіру туралы шешім қабылданды. Бұл түсірілім сапасын сақтап қана қоймай, фильмнің уақытылы шығуын қамтамасыз етеді. Мұндай шаралар көрермендердің үмітін ақтап және Ұлы кейіпкерді еске алуға лайықты фильм түсіруге көмектесетініне сенімдіміз», – деп нақтылады министр.

Осы тұста министр аталған жобаны қаржыландыруға қатысты еш мәселе жоқ екенін де айтты.

«Біз фильмнің түсірілімін уақытында аяқтауға және оны үлкен экрандарда көрсетуге бар күшімізді саламыз. Қазақстан Республикасының Мәдениет және ақпарат министрлігі «Әлия» жобасына және тарихи жады мен ұлттық мұраны сақтауға бағытталған басқа да бастамаларға барлық қажетті қолдауды көрсетуді жалғастырады. Әлия Молдағұлова туралы фильм еліміздің мәдени өміріндегі маңызды оқиға болатынына және кейіпкеріміздің ерлігін тиісті деңгейде көрсете алатынына сенімдімін», – деп қорытындылады сөзін Аида Балаева.