Отбасының ерекше мақтанышы – ұрпақ сабақтастығы

Жетісу облысы, Қаратал ауданының Айдар ауылында еңбекқорлығымен елге сыйлы, есімі құрметпен аталатын Шакира Нұржұманқызы Идрисова тұрады. Ол – төзімділіктің, жерге деген сүйіспеншіліктің және отбасыға деген адалдықтың жарқын үлгісі.

1958 жылы көпбалалы отбасында дүниеге келген Шакира бала кезінен адал еңбектің қадірін білді. 1976 жылы механизаторлар курсын тәмамдап, алғаш рет МТЗ-40 тракторының рөліне отырды. «Қарлығаш» атты әйелдер трактор бригадасының құрамында жұмыс істей жүріп, қысқа мерзім ішінде үздіктердің бірі ретінде танылды. Адал еңбегі мен жоғары көрсеткіштері үшін ол бірнеше рет аудандық және республикалық деңгейде марапатталған.

Кейін күйеуі Асылхан екеуі ауыл шаруашылығы саласында еңбек жолын жалғастырып, зоотехник және ветеринар мамандықтарын меңгерді. 2000 жылы Идрисовтар отбасы өздерінің жеке шаруа қожалығын құрды. Қожалық иесінің есімімен аталатын «Идрисова Ш.Н.» шаруашылығында бүгінде қант қызылшасы, жоңышқа және басқа да ауыл шаруашылығы дақылдары өсіріледі. Жерді өңдеу мен өсімдіктерді күтіп-баптауда заманауи әдістер қолданылады.

Отбасының ерекше мақтанышы – ұрпақ сабақтастығы. Ұлдары Айдос пен Елдос ата-аналарының ісін жалғастырып, жаңа технологияларды игеріп жүр, ал немерелері жастайынан еңбекке және жерге құрметпен қарауға тәрбиеленуде. Жасына қарамастан, Шакира апа шаруашылықтың жан жүрегі болып қала береді – әркез далаға шығуға, трактор тізгіндеуге немесе ақыл-кеңес беруге дайын.

«Әр жаңа күн – жаңа мүмкіндік. Еңбек етіп, бала өсіріп, жақындарыңды сүйе білу – міне, шынайы бақыт деген осы», – дейді Шакира Нұржұманқызы.

Шакира Идрисованың өмірбаяны – табанды еңбек, туған жерге деген сүйіспеншілік пен берік отбасылық құндылықтардың адам бақыты мен жетістігінің негізіне айналатынының жарқын үлгісі. Оның өмір жолы – жастарға шабыт беретін өнеге әрі еңбек адамының ауыл мен елдің басты байлығы болып қала беретінінің дәлелі.