ҚЫТАЙДАН КЕЛГЕН 22 СТУДЕНТ ҚОЗЫБАЕВ УНИВЕРСИТЕТІНДЕ

Қытай көшбасшысы Си Цзиньпиннің Қазақстанға ресми сапары аясында Қазақстан-Қытай ауыл шаруашылығы ғылымы мен білім беру орталығын ашу туралы тарихи келісімге қол қойылды. Бұл С.Сейфуллин атындағы Қазақ агротехникалық зерттеу университеті мен М.Қозыбаев атындағы Солтүстік Қазақстан университетінің, Шәкәрім университеті мен Солтүстік-батыс ауыл және орман шаруашылығы университетінің (ҚХР) бірлесіп құрған орталығы.

Орталық – агроөнеркәсіптік кешен үшін озық агротехнологиялар трансфері және жоғары білікті кадрлар даярлау үшін бірегей платформа. М.Қозыбаев атындағы СҚУ мен Солтүстік-батыс ауыл және орман шаруашылығы университеті арасындағы ынтымақтастық табысты әріптестіктің дәлелі.

Осы серіктестік аясында өсімдік және мал шаруашылығы бойынша ғылыми жобалар іске асырылуда. «Қызылжар Сүт» ЖШС және «Мамбетов және К» КТ сияқты алдыңғы қатарлы кәсіпорындардың базасында жем сапасын жақсарту, ауыл шаруашылығы жануарларының өнімділігі мен өсімін молайту бойынша зерттеулер жүргізілетін демонстрациялық парктер ашылды.

Қозыбаев университетіне академиялық ұтқырлық аясында Солтүстік-батыс ауыл шаруашылығы және орман шаруашылығы университетінен (Янлин.қ) 12 бакалавр және 10 магистрант келді. Үш ай ішінде олар Солтүстік Қазақстан облысының жетекші мал шаруашылығы кәсіпорындарында практикалық дағдыларды игеріп, бейіндік пәндер бойынша теориялық білім алатын болады.

«Біздің университет Солтүстік-батыс ауыл шаруашылығы және орман шаруашылығы университетімен бірлескен ынтымақтастықтың кезең-кезеңімен өтуін растайды. Қаламызда уақыттарыңызды тиімді өткізіп, өз білімдеріңізді жетілдіресіздер және біздің шаруашылықтарымызда жұмыс тәжірибесіне қатысасыздар деп сенемін», – деді Басқарма Төрағасы-Ректор Ербол Исақаев.

Екі университет арасындағы ынтымақтастықтың артықшылығы – агроөнеркәсіптік кешеннің дамуына тікелей әсер ететін білім мен технологиялардың алмасуы. Студенттер баға жетпес халықаралық тәжірибеге ие болады, біліктілігін арттырады және Қытайда қолданылатын озық технологиялар мен әдістер туралы біледі.