Жұмысшы мамандықтары қаласы – жұмыс берушілер мен келешек еңбеккерлер мүдделерінің тоғысқан аумағы

Елордада «Жұмысшы мамандықтары қаласы» атты фестиваль ашылды. Шара болашақ мамандар, жұмыс берушілер және техникалық, кәсіптік білім беру ұйымдары арасындағы байланысты нығайтатын алаң болмақ. Ашылу салтанатына ҚР Премьер–министрінің орынбасары Тамара Дүйсенова, оқу-ағарту министрі Ғани Бейсембаев қатысты.      

Фестиваль қатысушылары алдында сөз алған вице-премьер Президент жариялаған «Жұмысшы мамандықтары жылы» шеңберінде ауқымды жоспар қабылданғанын атап өтті. Колледждер әлеуетін көтеру үшін техникалық және кәсіптік білім беру саласын трансформациялау жұмысы басталғанына мән берді.

«Заманауи қалашықта жастар қазіргі уақытта немесе келешекте еңбек нарығынан өз орнын табу үшін қандай дағдыны меңгеруі керек, қандай салада сұраныс көп әрі қайсысына икемі барын көре алады. Ол үшін еліміздің ірі кәсіпорындары ерекше үлгідегі көрмені ұйымдастырып отыр. Жұмысшы мамандықтары қаласы – жұмыс берушілер мен келешек еңбеккерлер мүдделерінің тоғысқан аумағы», — деп атап өтті Тамара Дүйсенова.

Айта кетейік, жұмысшы мамандықтары қаласы фестивалі 5 күнге жоспарланған. Жобаның мақсаты – жұмысшы мамандықтар беделін арттыру, экономикада сұранысқа ие мамандықтарды танымал ету, жастар арасында кәсіптік бағдар беруді дамыту, жұмыс берушілердің қызметкерлерді оқытуға және қолдауға ат салысуын ынталандыру.

Фестиваль болашақ мамандардың, жұмыс берушілер мен техникалық және кәсіптік білім беру ұйымдарының өзара әрекеттесу алаңына айналады. Бірегей формат келушілерге арнайы құрылғылар мен интерактивті платформалардың көмегімен әртүрлі кәсіптердің ерекшеліктерімен танысуға және экономиканың әртүрлі салаларында өздерін сынауға мүмкіндік береді.

«Жұмысшы мамандықтары қаласының» қонақтарына арнайы тақырыптық көшелер: тау-кен металлургия, машина жасаушылар мен көлік саласы қызметкерлері көшесі, ауыл және су шаруашылығы қызметкерлері көшесі, құрылысшылар көшесі, болашақ мамандықтар, құтқарушылар мен өрт сөндірушілер бұрышы және басқалары салынды.

Бірнеше күн ішінде түрлі семинарлар мен шеберлік сыныптары, мұнай және энергетика салаларындағы тақырыптар бойынша хакатон, мамандықтар шеруі, бос жұмыс орындары жәрмеңкесі, стартаптардың тұсаукесері, машина жасау бойынша шеберлік сыныптары, концерттер, халықаралық аккредиттелген техникалық және кәсіптік оқыту курстары және тағы басқа іс-шаралар өтеді.