Қоршаған ортаны қорғау жолында адал еңбек етуде

Қоршаған ортаны қорғау – жай ғана ғылым емес, бұл болашақ үшін жауапкершілік. Осы жолды саналы түрде таңдаған жандардың бірі – Атырау мұнай өңдеу зауытының жетекші инженері Мөлдір Дүйсенғалиқызы Борашова.

Мөлдір Құлсары қаласындағы №1 орта мектепті жақсы нәтижемен аяқтап, Х.Досмұхамедов атындағы Атырау мемлекеттік университетінде экология мамандығын үздік бітірді. Кейін Л.Гумилев атындағы Еуразия ұлттық университетінде жаратылыстану ғылымдарының магистрі атанып, ғылым жолын жалғастырды. Қазіргі таңда ол С.Өтебаев атындағы Атырау мұнай және газ университетінде PhD докторантурада білім алуда.

Еңбек жолын 2015 жылы жастар тәжірибесі арқылы бастап, экология кафедрасында оқытушы, одан соң зауытта инженер, кәсіподақ саласында мәдени-ағарту жұмыстарын үйлестіруші, музей меңгерушісі сынды түрлі бағытта өзін көрсете білді. Бұл жылдар бойы жинақтаған тәжірибесі мен жан-жақтылығын айғақтайды.

2022 жылдан бері Мөлдір Атырау МӨЗ-дің Қоршаған ортаны қорғау бөлімінде жетекші инженер ретінде еңбек етуде. Кәсібіне адал, жаңашылдыққа ұмтылатын, кәсіби біліктілігін үздіксіз арттырып келе жатқан маман — жас экологтардың үлгісі.

«Қоршаған ортаны қорғау арқылы біз болашақ ұрпаққа аманат қалдырамыз. Мен үшін еңбектің мәні — табиғатқа деген жауапкершілікті сезіну және өндірістің экологиялық қауіпсіздігін қамтамасыз ету», — дейді Мөлдір Борашова.

Мөлдір Дүйсенғалиқызының еңбек жолы – экология саласына жан-тәнімен берілген жандардың өмір жолы. Бүгінгі таңда ол тек зауыттың ғана емес, өңірдің де экологиялық мәдениетін қалыптастыруға үлес қосып келеді.